ദിമി ട്രാക്കിലായി,ഈസ്റ്റ് ബംഗാളിൽ പൊളിച്ചടുക്കുന്നു!
കഴിഞ്ഞ ഇന്ത്യൻ സൂപ്പർ ലീഗ് സീസണിൽ ഗോൾഡൻ ബൂട്ട് നേടിയ താരമാണ് ദിമിത്രിയോസ് ഡയമന്റക്കോസ്. കേരള ബ്ലാസ്റ്റേഴ്സിന് വേണ്ടിയായിരുന്നു അദ്ദേഹം ഗോളടിച്ചു കൂട്ടിയിരുന്നത്.എന്നാൽ പിന്നീട് ക്ലബ്ബിനകത്ത് തുടരാൻ അദ്ദേഹം തയ്യാറായില്ല. കോൺട്രാക്ട് പൂർത്തിയാക്കിയതിന് ശേഷം ദിമി ഈസ്റ്റ് ബംഗാളിലേക്ക് പോവുകയായിരുന്നു.ആകർഷകമായ ഒരു ഓഫർ തന്നെയായിരുന്നു അദ്ദേഹത്തിന് അവിടെ നിന്നും ലഭിച്ചിരുന്നത്.
ഈസ്റ്റ് ബംഗാളിലെ ആദ്യ മത്സരങ്ങളിൽ ഗോളടിക്കാൻ ബുദ്ധിമുട്ടുന്ന ഒരു ദിമിയെയാണ് നമുക്ക് കാണാൻ കഴിഞ്ഞിരുന്നത്. താരം കളിച്ച ആദ്യത്തെ മൂന്ന് ഐഎസ്എൽ മത്സരങ്ങളിൽ ഗോളുകൾ ഒന്നും നേടിയിരുന്നില്ല. പക്ഷേ ഇപ്പോൾ ദിമി ട്രാക്കിലായി കഴിഞ്ഞിട്ടുണ്ട്.ഈസ്റ്റ് ബംഗാളിന് വേണ്ടി അദ്ദേഹം പൊളിച്ചടുക്കുകയാണ്.
അവസാനമായി കളിച്ച നാല് മത്സരങ്ങളിലും അദ്ദേഹം ഗോൾ നേടിയിട്ടുണ്ട്.4 മത്സരങ്ങളിൽ നിന്ന് അഞ്ച് ഗോളുകളാണ് അദ്ദേഹം നേടിയിട്ടുള്ളത്. ഒഡീഷക്കെതിരെ താരം ഒരു ഗോൾ നേടിയിരുന്നു.അതിന് ശേഷം AFC ചാലഞ്ച് ലീഗിൽ പാറോ എഫ്സിക്കെതിരെ ഈസ്റ്റ് ബംഗാൾ സമനില വഴങ്ങിയിരുന്നു. ആ മത്സരത്തിൽ ഒരു ഗോൾ നേടാൻ ദിമിക്ക് സാധിച്ചിട്ടുണ്ട്.
പിന്നീട് ബസുന്തര കിങ്സിനെ എതിരില്ലാത്ത നാല് ഗോളുകൾക്ക് ഈസ്റ്റ് ബംഗാൾ പരാജയപ്പെടുത്തുകയും ചെയ്തിരുന്നു. മത്സരത്തിൽ ഒരു ഗോൾ നേടാൻ ദിമിക്ക് സാധിച്ചു. അതിന് ശേഷം അൽ നെജ്മ എന്ന ക്ലബ്ബിനെ രണ്ടിനെതിരെ മൂന്നു ഗോളുകൾക്കാണ് ഈസ്റ്റ് ബംഗാൾ പരാജയപ്പെടുത്തിയത്. മത്സരത്തിൽ രണ്ട് ഗോളുകൾ നേടിയത് ദിമിയാണ്.
ഇങ്ങനെ തകർപ്പൻ പ്രകടനമാണ് അദ്ദേഹവും ഈസ്റ്റ് ബംഗാളും ഇപ്പോൾ നടത്തുന്നത്.AFC ചാലഞ്ച് ലീഗിൽ അവർ ക്വാർട്ടർ ഫൈനലിൽ പ്രവേശിച്ചിട്ടുണ്ട്.എന്നാൽ ഐഎസ്എല്ലിൽ ആ പ്രകടനം അവർക്ക് തുടരാൻ കഴിയുന്നില്ല. അധികം വൈകാതെ ഐഎസ്എല്ലിലും അവർ തിളങ്ങുമെന്നാണ് ആരാധകർ പ്രതീക്ഷിക്കുന്നത്.
