ഐഎസ്എല്ലിന് പകരം ഫിയാഗോ കപ്പ്,ബ്ലാസ്റ്റേഴ്സിനെ ട്രോളി മുംബൈ ആരാധകർ!
കേരള ബ്ലാസ്റ്റേഴ്സിന് ഇന്നലത്തെ മത്സരത്തിലും തോൽവിയാണ് വഴങ്ങേണ്ടി വന്നിട്ടുള്ളത്. രണ്ടിനെതിരെ നാല് ഗോളുകൾക്കാണ് മുംബൈ സിറ്റി ബ്ലാസ്റ്റേഴ്സിനെ തോൽപ്പിച്ചിട്ടുള്ളത്.മുംബൈ സിറ്റിയുടെ മൈതാനത്തായിരുന്നു ഈ മത്സരം നടന്നിരുന്നത്. മത്സരത്തിൽ ബ്ലാസ്റ്റേഴ്സ് താരങ്ങൾ പിഴവുകളും മണ്ടത്തരങ്ങളും കാണിച്ചു.അതുകൊണ്ടുതന്നെയാണ് ഇത്രയും വലിയ തോൽവി ഏറ്റുവാങ്ങേണ്ടി വന്നിട്ടുള്ളത്.
ഈ മത്സരം കാണാൻ വേണ്ടി ഒരുപാട് ആരാധകർ സ്റ്റേഡിയത്തിൽ ഉണ്ടായിരുന്നു.ബ്ലാസ്റ്റേഴ്സിന്റെ മഞ്ഞപ്പട അംഗങ്ങൾ ഒരുപാട് ഉണ്ടായിരുന്നു. അതുപോലെതന്നെ മുംബൈ ആരാധകരും ഉണ്ടായിരുന്നു.ബ്ലാസ്റ്റേഴ്സിനെ വലിയ രീതിയിൽ അവർ ട്രോൾ ചെയ്തിട്ടുണ്ട്.ചില ബാനറുകളും പോസ്റ്ററുകളും അവർ പ്രദർശിപ്പിച്ചിരുന്നു. അതിലൊന്ന് ബ്ലാസ്റ്റേഴ്സ് ഈയിടെ നേടിയ ഫിയാഗോ ഫാൻസ് കപ്പിനെയാണ്.
ആരാധകരുടെ പോളിൽ വിജയിച്ചു കൊണ്ടായിരുന്നു ബ്ലാസ്റ്റേഴ്സ് ഫിയാഗോ കപ്പ് നേടിയിരുന്നത്.ഇതൊരു ബാനറിൽ ട്രോൾ രൂപത്തിൽ അവർ അവതരിപ്പിച്ചിട്ടുണ്ട്.ഐഎസ്എൽ കിരീടം സ്വപ്നം കാണുന്ന ഒരു ആനയുടെ ചിത്രമാണ് അതിലുള്ളത്. നിരാശനായി ഇരിക്കുന്ന ആനയുടെ കൈവശമുള്ളത് ഫിയാഗോ കപ്പാണ്.ബ്ലാസ്റ്റേഴ്സിന് ഐഎസ്എൽ ട്രോഫി ഇല്ലാത്തതിനെ പരിഹസിക്കുകയാണ് ഇതിലൂടെ മുംബൈ ആരാധകർ ചെയ്തിട്ടുള്ളത്.
വേറെയും പലവിധത്തിലുള്ള ട്രോൾ പോസ്റ്ററുകൾ അവർ ഇറക്കിയിട്ടുണ്ട്. എന്നാൽ ഇതിനൊന്നും മറുപടി നൽകാൻ കഴിയാത്തതിന്റെ നിരാശയിലാണ് ബ്ലാസ്റ്റേഴ്സ് ആരാധകർ.മത്സരത്തിൽ വിജയിച്ചിരുന്നുവെങ്കിൽ ഇതിനെല്ലാം മറുപടി നൽകാൻ സാധിക്കുമായിരുന്നു.എന്നാൽ അവിടെയും നിരാശ മാത്രമായിരുന്നു ഫലം. തുടർച്ചയായ രണ്ടാം മത്സരത്തിലും തോൽവി വഴങ്ങേണ്ടിവന്നത് ആരാധകരെ ഏറെ നിരാശപ്പെടുത്തിയിട്ടുണ്ട്.
