കേരള ബ്ലാസ്റ്റേഴ്സ് അവസാനമായി കളിച്ച മത്സരത്തിലും പരാജയപ്പെടുകയാണ് ചെയ്തിട്ടുള്ളത്.രണ്ടിനെതിരെ നാല് ഗോളുകൾക്കാണ് മുംബൈ സിറ്റി ബ്ലാസ്റ്റേഴ്സിനെ പരാജയപ്പെടുത്തിയത്.ഈ മത്സരത്തിന്റെ രണ്ടാം പകുതിയിൽ ബ്ലാസ്റ്റേഴ്സിന് ഗോളടിക്കാനുള്ള ഒരു സുവർണ്ണാവസരം ലഭിച്ചിരുന്നു.മുംബൈ ഗോൾകീപ്പർ വരുത്തിവെച്ച പിഴവ് കാരണം കേരള ബ്ലാസ്റ്റേഴ്സിന് പെനാൽറ്റി ബോക്സിനകത്ത് വെച്ചുകൊണ്ട് ഒരു ഫ്രീകിക്ക് ലഭിക്കുകയായിരുന്നു.
ലൂണ നീക്കി നൽകിയ ഈ ഫ്രീകിക്ക് ജീസസ് ഒരു തകർപ്പൻ ഷോട്ടാക്കി മാറ്റുകയായിരുന്നു. പക്ഷേ നിർഭാഗ്യവശാൽ അത് ഗോളായി മാറിയില്ല. മറിച്ച് അത് പോസ്റ്റിൽ ഇടിച്ചുകൊണ്ട് മടങ്ങുകയായിരുന്നു. ഗോൾ നേടാനുള്ള സുവർണ്ണാവസരമാണ് നിർഭാഗ്യം കൊണ്ട് പാഴായി പോയത്. പക്ഷേ ഇത് ആദ്യത്തെ സംഭവം ഒന്നുമല്ല.
ബ്ലാസ്റ്റേഴ്സിൽ എത്തിയതിനു ശേഷം വുഡ് വർക്കിനെ പ്രണയിക്കുന്ന ഒരു ജീസസ് ജിമിനസിനെയാണ് നമുക്ക് കാണാൻ കഴിയുന്നത്. അതായത് അദ്ദേഹത്തിന്റെ ഷോട്ടുകളിൽ പലതും പോസ്റ്റിൽ ഇടിച്ചു മടങ്ങും,അതല്ലെങ്കിൽ ക്രോസ് ബാറിൽ ഇടിച്ചു മടങ്ങും.ഏഴ് മത്സരങ്ങൾക്കിടയിൽ നാല് തവണയാണ് നമുക്ക് ഇത് കാണാൻ കഴിഞ്ഞിട്ടുള്ളത്.ഏറ്റവും ഒടുവിലാണ് മുംബൈ സിറ്റിക്കെതിരെ പോസ്റ്റിൽ ഇടിച്ചു മടങ്ങിയത്.
ഈസ്റ്റ് ബംഗാളിനെതിരെ താരത്തിന്റെ ഒരു ഷോട്ട് പോസ്റ്റിൽ ഇടിച്ചു മടങ്ങിയിരുന്നു.മത്സരത്തിന്റെ എട്ടാം മിനുട്ടിലായിരുന്നു അത്. പിന്നീട് മുഹമ്മദൻ എസ്സിക്കെതിരെ നമ്മൾ അത് കണ്ടു. താരത്തിന്റെ ഒരു പവർഫുൾ ഷോട്ട് ക്രോസ് ബാറിൽ ഇടിച്ച് മടങ്ങുകയായിരുന്നു. മത്സരത്തിന്റെ 33ആം മിനിട്ടിലായിരുന്നു അത്.
പിന്നീട് ബംഗളൂരു എഫ്സിക്കെതിരെ താരത്തിന്റെ ഷോട്ട് ക്രോസ് ബാറിൽ ഇടിച്ചു മടങ്ങി.മത്സരത്തിന്റെ പത്താം മിനിറ്റിലായിരുന്നു അത്.അതിന് ശേഷമാണ് മുംബൈയ്ക്കെതിരെ സംഭവിച്ചത്.ചുരുക്കത്തിൽ നിർഭാഗ്യം ഈ താരത്തെയും ബ്ലാസ്റ്റേഴ്സിനെയും വിടാതെ പിന്തുടരുകയാണ്. എന്നിരുന്നാലും ഇതൊക്കെ മാറി ജീസസ് കൂടുതൽ ഗോളുകൾ നേടുമെന്ന് തന്നെയാണ് ആരാധകർ പ്രതീക്ഷിക്കുന്നത്.