അടുത്ത സീസണിലേക്കുള്ള ഒരുക്കങ്ങൾ കേരള ബ്ലാസ്റ്റേഴ്സ് നേരത്തെ തന്നെ ആരംഭിച്ചിരുന്നു. ടീമിനെ കൂടുതൽ ശക്തിപ്പെടുത്താനാണ് ബ്ലാസ്റ്റേഴ്സ് തീരുമാനിച്ചിരിക്കുന്നത്. ക്ലബ്ബിന്റെ രണ്ട് ഗോൾകീപ്പർമാർ ബ്ലാസ്റ്റേഴ്സിനോട് ഗുഡ് ബൈ പറഞ്ഞിരുന്നു. ലോണിൽ എത്തിയിരുന്ന ലാറ ശർമ്മ ബംഗളൂരു എഫ്സിയിലേക്ക് തന്നെ മടങ്ങിപ്പോയി.
അതേസമയം കരൺജിത്ത് ഇനി ബ്ലാസ്റ്റേഴ്സിനോടൊപ്പം ഉണ്ടാവില്ല എന്നാണ് റിപ്പോർട്ടുകൾ. അതുകൊണ്ടുതന്നെ ബ്ലാസ്റ്റേഴ്സ് ഒരു ഗോൾകീപ്പർ ഉടൻതന്നെ സൈൻ ചെയ്തിട്ടുണ്ട്. ഐ ലീഗിൽ നിന്നാണ് പുതിയ ഗോൾകീപ്പറെ കൊണ്ടുവന്നിട്ടുള്ളത്.ഐസ്വാൾ എഫ്സിയുടെ ഗോൾകീപ്പറായ നോറ ഫെർണാണ്ടസ് ഇനി ബ്ലാസ്റ്റേഴ്സിനോടൊപ്പമാണ് ഉണ്ടാവുക. ഇക്കാര്യത്തിൽ സ്ഥിരീകരണങ്ങൾ ലഭിച്ചു കഴിഞ്ഞു.
മാർക്കസ് മെർഗുലാവോ ഇക്കാര്യം റിപ്പോർട്ട് ചെയ്തു കഴിഞ്ഞിട്ടുണ്ട്. മൂന്ന് വർഷത്തെ കരാറിലാണ് അദ്ദേഹം ഒപ്പുവെച്ചത് എന്നാണ് അറിയാൻ സാധിക്കുന്നത്. 25 വയസ്സുകാരനായ താരം കഴിഞ്ഞ സീസണിൽ ഐസ്വാൾ എഫ്സിയുടെ റെഗുലർ സ്റ്റാർട്ടറായിരുന്നു. കഴിഞ്ഞ സീസണിൽ 17 മത്സരങ്ങൾ കളിച്ച താരം 5 ക്ലീൻ ഷീറ്റുകൾ സ്വന്തമാക്കിയിട്ടുണ്ട്.
കേരള ബ്ലാസ്റ്റേഴ്സിന്റെ ഒന്നാം ഗോൾകീപ്പറായിക്കൊണ്ട് സച്ചിൻ സുരേഷ് തന്നെയായിരിക്കും ഉണ്ടാവുക. അതിനുശേഷമാണ് നോറ ഫെർണാണ്ടസ് വരിക.ഇനി മറ്റൊരു ഗോൾ കീപ്പറെ കൂടി കേരള ബ്ലാസ്റ്റേഴ്സ് സൈൻ ചെയ്തേക്കും. അത് ഐഎസ്എല്ലിൽ നിന്നായിരിക്കും എന്നാണ് റിപ്പോർട്ടുകൾ. വളരെ വേഗത്തിൽ നീക്കങ്ങൾ നടത്താനാണ് ബ്ലാസ്റ്റേഴ്സിന്റെ പ്ലാനുകൾ.